لاحظتي قبل كده إنه بعد تنظيف المنزل بتحسي براحة نفسية وإنتعاش؟ فكرتى إزاي مسح التراب من الأرفف، أو المطبخ الرايق، والغرف المرتبة بيأثر على نفسيتك؟ المقال هيعرض بوضوح العلاقه بين الصحة النفسية وتنظيف المنزل
الأثر السلبى للفوضى
يعتبر الحفاظ على نظافة بيتك والقيام بأعمال التنظيف بإنتظام أمر مفيد ليك. في الواقع تقول الأبحاث أن التنظيف – أو عدم التنظيف – لهم تأثير مباشر على الصحة النفسية.
أثر الفوضى في الاكتئاب
على سبيل المثال، وجدت دراسة أن النساء اللي وصفوا أماكن معيشتهن بأنها أماكن مزدحمة أو مليانة بالكراكيب كانوا أكتر عرضة للإرهاق والاكتئاب من النساء اللي وصفوا بيوتهم بأنها مريحة و منظمة. وجد الباحثون أن النساء اللي بيوتهم مكركبة كان عندهم مستويات أعلى من هرمون الكورتيزول اللي بينتج من التوتر وزيادته بتؤدي إلى زيادة الوزن وأضرار أخرى.
الفوضى تؤدي إلى تقليل التركيز والارتباك والتوتر
في دراسة أخرى اكتشفوا أن مع الفوضى يصعب التركيز على مهمة معينة. يعني لو ابنك اوضته مكركبة هيكون صعب عليه يركز في المذاكرة مثلاً. حتى ذهنياً بترتبط الفوضى والكركبة بالعواطف السلبية زي الارتباك والتوتر بينما البيت المنظم بنربطه بالمشاعر الإيجابية زي الهدوء والشعور بالعناية وإن في إهتمام بالبيت وسكانه.
يعني التنظيف والتنظيم وتقليل الفوضى والكراكيب ،تساعد على خلق جو أكثر استرخاء و تساعدعلى التركيز بشكل أفضل.
فوائد التنظيف
المنزل النظيف بيأثر على صحتك الجسمانية. بعض الدراسات بتشير إلى أن اللي عندهم منازل نظيفة بيميلوا إنهم يكونوا أكثر صحة من اللي عندهم منازل فوضوية أو مزدحمة. يعني النظافة والترتيب ممكن تكون مؤشر على صحة بدنية ونفسية جيدة، والعكس صحيح!
التنظيف والحفاظ على البيت مرتب بيعلى احساسك بالسيطرة على بيئتك وكمان الإنهماك في نشاط متكرر في نهايته بتشعري بالانجاز وانك حولتي شيء لشيء تاني خالص بيكون له تأثير مهدئ على أعصابك وبيحسن الحالة المزاجية.
بعض الناس لما تبدأ تحس أن حياتهم خرجت عن السيطرة أو أنهم بيعانوا من بعض المشاكل اللي مش لاقيين لها حل، بيكون التنظيف والترتيب وسيلة لإستعادة بعض السيطرة في حياتهم. فبييعطيهم التنظيف إحساس بالإتقان والتحكم في بيئتهم.
يحسن مزاجك
بغض النظر عن فوائد الحصول على منزل أنظف فالعلاقة بين المنزل النظيف والصحة النفسية يمكن أن تساعدك على تقليل القلق.
الأمور الروتينية اليومية ممكن تكون متنفس للتخلص من التوتر الزائد في واحدة من التجارب المواظبين على غسل الأطباق وبيعيشوا “التجربة” بوعي يعني بيركزوا في عملية التنظيف نفسها، في ملمس الصابون وتدفق المياه بقى غسيل الأطباق كأنه جلسة علاج نفسي ولاحظ من قاموا بالتجربة انخفاض بنسبة 27٪ في التوتر ، إلى جانب 25٪ تحسن في الإبداع والإبتكار!
زيادة تركيزك
لما يكون منزلك فوضويً أو متسخً بدرجة زايدة عن الطبيعي ممكن ده يأثر على قدرتك على التركيز. غير إن الكركبة بتقلل من قدرة عقلك على معالجة المعلومات. كأن الكراكيب اللي بتشوفها بتستهلك جزء من ذهنك وطاقتك العقلية ، اكتشف الباحثون أن الناس بتكون أقل تشتتًا وأكثر إنتاجية وأكثر قدرة على معالجة المعلومات لما بتكون في منطقة عمل منظمة ومرتبة.
وبالتالي إذا كنت بتواجه مشكلة في التركيز على مشروع ما، حاول تنظم مساحة العمل بتاعتك في البداية. هتلاحظ أن تخصيص بضع دقايق بس في تنظيم أغراضك وإزالة أي فوضى هيسهل عليك التركيز وإنجاز عملك.
كيفية دمج التنظيف في حياتك
إذا كنت بتعاني من الاكتئاب، أو حامل أو عندك أطفال صغيرة ولذلك بتعيشى حياة فوضوية شوية، وعملية التنظيف والتخلص من الكركبة مهمة شاقة في الظروف دي. فخليني اقولك بلطف أن مجرد تواجدك في بيئة أنظف هيساعد في تحسين حالتك المزاجية ويخلي حياتك أكثر هدوء، وكلمة السر هي “الإستمرارية
ابدأى بالمهام الصغيرة
معظم الناس بيأجل التنظيف لأنه المهمة بتبان أكبر من قدرته على إنهائها. فبدل ما تحطي هدفك ترتيب البيت بالكامل في عطلة نهاية أسبوع واحدة، ابدأى بالمهام الصغير وانجزي شوية كل يوم، التزمي بعمل شيء واحد بس في منزلك أو شقتك كل يوم ، وبكدا هتكون بيئتك أكثر نظافة وأقل إرهاق في وقت قصير.
على سبيل المثال، اختاري حاجة واحدة انتي عاوزة تعمليها النهاردة وكل يوم إختاري حاجة جديدة. في يوم مثلاً تنظيف حوض الحمام. وفي اليوم التالي، تنظيف أسطح نملية المطبخ، وفي اليوم التالي تلم كل الملابس المنتشرة في أنحاء البيت وتلمها في سلة غسيل يوم وراء يوم البيت هيتحسن شكله وانتي هتتعودي ترتبي وهتعرفي ان وقت العمل والمجهود المطلوب أدائه اقل بكتير من عبء التعايش مع تأجيله وتصور انه صعب إنجازه والشعور بالذنب الخفي من عدم القيام به.
اضبطي الوقت
كتير مبنعرفش نقدر الوقت اللازم لأداء مهمة في البيت، انصحك تظبطي منبه لمدة 15 دقيقة بس وقومي رتبي البيت بسرعة ونشاط بس لمدة 15 دقيقة وبعدها شوفي هل كنتي تتوقعي انك تقدري كل اللي انجزتيه في الوقت ده؟ في معظم الأحيان هتلاقي ان 15 ق ممكن تكون كافية “تلمي” غرفة بحالها وتحوليها من مكان مكركب وشكله يضايق إلى مكان لطيف يمكن الجلوس فيه بإرتياح. هنا بنتكلم على تنظيف سطحي، يعني نلم الحاجات اللي مش في مكانها نرتب السرير او الانتريه نمسح التراب من على الاسطح ونكنس الأرض.
ممكن تبدأي بغرفة المعيشة عشان تساعدي نفسك واسرتك يتمتعوا بيوم أكثر هدوءً أو تبدأي في غرفة نوم لو عايزة تخلقي بيئة أكثر هدوء تساعدك على النوم بشكل أفضل بالليل.
بضع دقائق من “العمل” هتنجز اكتر مما تتصوريه وهتكون كجهد اقل جداً من الحوارات الداخلية السلبية الناتجة عن التسويف والتوتر وتأنيب النفس، البيت المنظم المرتب مش لازم توصلي له بساعات طويلة ومرهقة تضيعي بها أجازة الأسبوع.
اطلبي المساعدة من الآخرين
أحيانًا بتكوني في مرحلة من حياتك بيكون فيه التنظيف مش حاجة سهلة تقدري تتعاملي معاه بنفسك. ممكن يكون وقتك مزدحم بالكثير من الاعمال. كأن تكونى بتديري مشروع خاص بيك، أو مشغولة برعاية أطفالك فى سنهم الصغيرة، مهما كان وضعك، إذا كنت تعرفى إنك مش هتقدرى تنجزى كل ده لوحدك، إذًن لازم تفكري في إشراك الآخرين.
اطلبى المساعدة من الأصدقاء والعائلة
على الرغم من أن طلب المساعدة ممكن يكون صعب، إلا أن معظم الناس على استعداد لمساعدتك لو طلبت ده. علشان كده متتردديش تطلبي من زوجك يساعدك باعمال معينة، وكذلك يمكنك أن تدعى أطفالك يساعدوا فى بعض الاعمال حسب أعمارهم وامكانياتهم.
احصلى على مساعدة خارجية
وإذا كانت ميزانيتك تسمح، تقدري تستعيني ب حد يساعد مرة أو مرتين في الشهر. حيث يمكنهم القيام بالتنظيف العميق والمهام الصعبة. وبعد ذلك واظبى انتى باقي الأيام على الروتين اللي يحافظ على البيت مرتب ونظيف بأقل جهد.
كلمة أخيرة من شيكا
التنظيف والتخلص من الفوضى والكركبة فعلاً بيساعدوا في تخفيف التوتر، وبيقللوا من القلق، وبيحسنوا المزاج، غير أنه حركة ونشاط وحرق سعرات وفي الحركة بركة راجعي أدوات التنظيف في بيتك وابدأي فوراً في روتين هيفرق كتير معاكي نفسياً وصحياً وعائلياً. مجرد الرجوع بعد الشغل لبيت نظيف ومنظم ده لوحده ممكن يساعد على التخلص من توتر اليوم كله.
زورى موقع شيكا دايت للمزيد من المقالات
تجولى ب متجر شيكا واختارى ادوات التنظيف المثاليه