من أكثر المشاكل الصحية في العصر الحديث الأرق و إضطرابات النوم سواء كان ما نشكوا منه هو عدم الحصول على 8 ساعات من النوم أو اننا بنام ونرجع نصحى بليل ومنعرفش نكمل نوم بسهولة. بصفة عامة الأرق بصورة متكررة كل ليلة بيأثر على توازن الهرمونات في الجسم وبيؤدي إلى زيادة الشهية لتناول الطعام تقليل قدرة الجسم على حرق الغذاء، وبالتالي زيادة الوزن
هاقولك زي الشيف شربيني هاتي ورقة وقلم واكتبي ورايا يا ست الكل
من أول الوسائل اللي ممكن نستخدمها في المجال ده هي تسجيل اليوميات قبل النوم.
اكتبي أحلى حاجة حصلت لك النهاردة كانت ايه؟
اوعي تقولي مفيش ! الحياة دايما فيها لحظات جميلة قد تكون بسيطة فلا نلاحظها بالقدر الكافي وننسى أن نحتفي بها. لو يومك عدا بسلام وانتهى وانتي بخير واسرتك ومن تحبين بخير فده في حد ذاته نعمة كبيرة يعرفها تماما من لم يمر اليوم عليهم بخير. فكري كويس في السؤال. ممكن مكالمة من صاحبتك اسعدتك، ممكن حضن من ابنك بدون مناسبة، ممكن انك متخانقتيش مع زوجك النهاردة ! التعرف على اللحظات الحلوة اللي مرت علينا وادراكها بيعدل من كيمياء المخ وبيخلي في مجال لتحسين العلاقة مش بس مع اللي حوالينا لكن مع نفسنا كمان.
اكتبي إيه اللي كان ممكن تعمليه النهاردة وكان هيخلي اليوم أجمل؟
يمكن انك كنتي تعبري لحد عن محبتك وتقديرك له. أو انك مكنتيش زعقتي مثلا لابنك لما عمل الحاجة الفلانية. ممكن تكون انك لو كنتي صحيتي بدري نص ساعة كنتي هتقدري تعملي شوية رياضة في البيت قبل ما تنزلي شغلك. يمكن انك لو كنتي قبلتي اعتذار صاحبتك بدل ما كسفتيها وحاسة بالندم من ساعتها. الهدف من السؤال والتفكير ده إدارك ان عندك القدرة على التغيير وعلى تحويل دفة حياتك نحو الأفضل كل يوم. وده هيديكي ثقة في نفسك وقدراتك.
ربع ساعة مع الورقة والقلم ونظرة ايجابية على يومك وتأكيد على قدرتك على تغيير حياتك للأفضل هتساعدك تنامي بدون افكار سلبية او مشاعر مكبوتة تفضل تزن في دماغك وتسلبك نعمة النوم الهاديء المطمئن.
متنسيش قبل ما تطفي النوم تقرأي قليل من الآيات والأذكار. أتمنى لك نوم هاديء عميق ومطمئن.
تابعي شيكا واعرفي اكتر طرق ووصفات لعلاج الأرق وإضطرابات النوم مؤسسة على أحدث الدراسات والأبحاث العلمية في المجال ده.